Ӗнер, нарӑс уйӑхӗн 2-мӗшӗнче, Чӑваш Республикин тава тивӗҫлӗ тренерӗ Геральд Салдимиров 70 ҫул тултарнӑ.
Геральд Прокопьевич биатлон енӗпе хӑй вӑхӑтӗнче Чӑваш Ен чемпионӗ ята тата Атӑлҫи тӑрӑхӗнчи регионсен хӗллехи спартакиадинче бронза медале тивӗҫнӗ.
Муркаш районӗнчи Мӑн Сӗнтӗрти вӑтам шкулта вӗреннӗ чухне йӗлтӗр секцине ҫӳренӗ. 1993 ҫулта Челябинскри физкультура институтӗнчен вӗренсе тухнӑ.
Халӗ вӑл Шупашкарти 2-мӗш Олимп резервӗн спорт шкулӗнче тӑрӑшать. Геральд Прокопьевич 10 ытла Раҫҫейӗн спорт мастерне вӗрентсе кӑларнӑ, вӗсен йышӗнче тӗнче, Европа чемпионӗсемпе Олимп вӑййисен ҫӗнтерӳҫисем пур.
Муркаш районӗнчи Владимир Осетров водителе «Чӑваш Республикин ял хуҫалӑхӗн тава тивӗҫлӗ ӗҫченӗ» ята панӑ. Хушӑва республика Элтеперӗ алӑ пуснӑ.
Владимир Аркадиевич 40 ҫул ытла Муркаш районӗнчи кайӑк-кӗшӗк фабрикинче ӗҫлет. 1984 ҫулта вӑл унта слесарь пулса вырнаҫнӑ, кайран водительте тимлеме пуҫланӑ. Халӗ вӑл грузовиксемпе те ҫӳрет, кӑткӑс ял хуҫалӑх техникине те ҫӑмӑллӑнах итлеттерет. Хӑйӗн опычӗпе ҫамрӑк специалистсене те паллаштарать.
Кӑрлач уйӑхӗн 22-мӗшӗнче Россельхознадзор управленийӗн ӗҫченӗсем «Шупашкар-Сурски» ҫул ҫинче качакапа ҫула тухнӑ ҫынна тытса чарнӑ. Мӑйракаллӑ пӗчӗк выльӑха пӗр ҫын Муркаш районӗнчен Патӑрьел районне турттарса каясшӑн пулнӑ. Анчах выльӑхӑн ветеринари докуменчӗ пулман.
Надзор ведомствин инспекторӗсем качака хуҫине асӑрхаттару хучӗ ҫырса панӑ.
Муркаш округӗнчи Турай тӑрӑхӗнче пурӑнакан Ольга Краснова ҫак кунсенче 100 ҫулхи юбилейне паллӑ тунӑ.
Ольга Дмитриевна Уйкас ялӗнче ҫуралса ӳснӗ. Ҫамрӑклах колхоз ӗҫне кӳлӗннӗ, фронта кайнӑ арҫынсен вырӑнне тӑрӑшнӑ.
Вӑл – тыл ӗҫченӗ. Ҫӗнтерӗве ҫывхартма пулӑшнӑшӑн ӑна «1941-1945 ҫулсенчи Тӑван ҫӗршывӑн Аслӑ вӑрҫинче хастар ӗҫленӗшӗн» медальпе чысланӑ.
Паян ирхи 3 сехетре Муркаш округӗнчи заправкӑра машина ҫунса кайнӑ. Ку Ивановка ялӗ патӗнче пулнӑ.
Вырӑна ҫитнӗ ҫӑлавҫӑсем ҫунакан «Рендж Ровер» иномаркӑна часах сӳнтернӗ, ҫулӑма юнашарти бензоколонкӑсем ҫине куҫма паман.
Шел те, инкекре машинӑн 42 ҫулти хуҫи шар курнӑ. Вӑл тӗтӗм-сӗрӗмпе наркӑмӑшланнӑ. Ӑна медпулӑшу панӑ.
Нумаях пулмасть Шупашкар хула администрацийӗ чи лайӑх дворниксене чысланӑ, ҫав йышра Тамара Тарасова та пулнӑ.
Тамара Львовна 65 ҫулта, вӑл Шупашкарта дворникре ӗҫлет. Ку профессире 17 ҫул тӑрӑшать. Тамара Львовна кашни ир ӗҫе Муркаш округӗнчи Мӑн Сӗнтӗртен килет.
«Мана килӗшет хамӑн ӗҫ. Эпӗ профессионал пуль ӗнтӗ. Эпӗ пӑхса тӑракан ҫуртсенче лайӑх ҫынсем пурӑнаҫҫӗ, мана хисеплеҫҫӗ», – тет вӑл.
Муркаш районӗнчи тӳре-шара тӑлӑхсене япӑх хваттер туянса панӑ. Район пуҫлӑхӗн тӗлӗшпе пуҫиле ӗҫ пуҫарни пирки республикӑн прокуратуринче хыпарланӑ.
Тӑлӑхсене Мӑн Сӗнтӗрте хваттер туянса панӑ. Вӗсем санитари тата техника тӗлӗшӗнчен тивӗҫтермен. Хыснана 13 миллион ытла тенкӗлӗх тӑкак кӳнӗ.
2022 ҫултанпа Муркаш районне Алексей Матросов ертсе пырать иккен, 2018-2022 ҫулсенче вӑл муниципалитет пуҫлӑхӗн пӗрремӗш ҫумӗ — тӗплӗ юсав пайӗн пуҫлӑхӗ пулса тӑрӑшнӑ.
Кӑҫал республикӑри чи лайӑх ялти культура ҫурчӗсене – 2,25 млн, чи лайӑх 11 ӗҫченне преми евӗр хавхалантарма 825 пин тенкӗ уйӑрса парӗҫ. Хушӑва республика премьер-министрӗ Сергей Артамонов алӑ пуснӑ.
Пулӑшӑва 18 округ тивӗҫӗ. Чи пысӑк гранта Вӑрнар округне уйӑрса парӗҫ – пӗтӗмпе 375 пин тенкӗ. Йӗпреҫ, Комсомольски округӗсем 300-шер пин тенке тивӗҫӗҫ. Канаш, Муркаш, Шупашкар тата Шӑмӑршӑ округӗсене 225-шер пин тенкӗ парӗҫ.
Муркаш округӗнче Паташлӑх автоиспекцийӗ васкавлӑ медпулӑшу бригадине кӗрт ӑшӗнчен тухма пулӑшнӑ.
Васкавлӑ медпулӑшу бригади пациент патӗнче пулнӑ, ӑна пулӑшу панӑ хыҫҫӑн каялла кайма тухнӑ. Анчах Йӳҫкассинче вӗсем юр ӑшне кӗрсе ларнӑ. Ку ҫур ҫӗр иртни 3 сехетре пулнӑ.
Тухтӑрсем инҫех мар дежурствӑра тӑракан Паташалӑх автоинспекцийӗн инспекторӗсенчен пулӑшу ыйтнӑ. Полици лейтенанчӗ Николай Кулюкин, Руслан Прокопьев стажер тата взвод командирӗн ҫумӗ Павел Кокшин машинӑна юр ӑшӗнчен алӑпа тӗксе кӑларнӑ. Кун хыҫҫӑн васкавлӑ медпулӑшу машини малалла дежурствӑна кайнӑ.
Раҫҫейри чи лайӑх педагог-библиотекарьсем Чӑвашра ӗҫлеҫҫӗ.
Муркаш тӑрӑхӗнчи Калайкасси шкулӗнче тимлекен Саида Колдашова тата Ҫӗнӗ Шупашкарти 17-мӗш шкулти Галина Чернышёва «Раҫҫейри чи лайӑх педагог-библиотекарь» конкурс призёрӗсем пулса тӑнӑ. Кун пирки Телеграмри «Пуринчен малтан» каналта хыпарланӑ.
Конкурса 89 регионтан 3000 яхӑн заявка тӑратнӑ, 300-шӗ финала тухнӑ.
+20.1 °C